Դավթաշեն վարչական շրջանի տարածքը տեղակայված է Երևան քաղաքի արևմտյան մասում:
Տարածքը՝ 686 հա
Բնակչությունը՝ 42,500 մարդ:
բնակելի շենքերի ընդհանուր քանակը` 191:
Բարձրությունը ծովի մակարդակից՝ 1.109.6 մ:
Դավթաշեն համայնքը Երևան քաղաքի արևմտյան հատվածում է: Համայնքը սահմաններ ունի Երևանի Աջափնյակ, Արաբկիր համայնքների հետ: Արտաքին սահմանագծով հարում է Կոտայքի մարզին: Ընդգրկում է I, II, III, IV թաղամասերը և Դավթաշեն գյուղը:
Դավթաշենը անցյալում եղել է քարքարոտ և ամայի տարածք: Այստեղով անցնում է մայր առուն, որի ափերին էլ կառուցվել են 4-րդ և 1-ին գյուղերը, որոնց բնակիչները 1938-ին գաղթել են Ապարանի շրջանի տարբեր գյուղերից: Տարածքը հարուստ է եղել տուֆ հանքաքարով, որով էլ կառուցվել է գյուղը:
1939-ին, Սասունցի Դավթի անունով առաջին գյուղը վերանվանվել է Դավթաշեն:
Բարեկարգվելով և կառուցապատվելով գյուղը ընդարձակվում ու վերածվում է քաղաքամերձ ավանի:
Հետագայում գյուղին է միանում նորակառույց թաղամասը՝ դառնալով Երևան քաղաքի Դավթաշեն թաղային համայնքի կենտրոնը: Դավթաշենը համայնքի կարգավիճակ է ստանում 2007 թվականին:
